ڈگری اب نوکری کی ضمانت نہیں، ملائیشیا میں ہائی اسکلڈ ملازمین بھی برطرفیوں کی زد میں

کوالالمپور: ملائیشیا میں ملازمت کے رجحانات میں بڑی تبدیلی سامنے آئی ہے جہاں اب اعلیٰ تعلیم یافتہ اور ہنر مند افراد بھی نوکریوں سے برطرف کیے ...

کوالالمپور: ملائیشیا میں ملازمت کے رجحانات میں بڑی تبدیلی سامنے آئی ہے جہاں اب اعلیٰ تعلیم یافتہ اور ہنر مند افراد بھی نوکریوں سے برطرف کیے جانے کے خطرے سے محفوظ نہیں رہے۔ جدید ٹیکنالوجی میں تیزی سے ترقی کی وجہ سے موجودہ معاشی حالات میں ڈگری یا اعلیٰ عہدہ بھی ملازمت کی ضمانت نہیں رہا۔

تفصیلات کے مطابق بلاک چین اکیڈمی کے ڈائریکٹر ڈیوڈ یانگ نے سوشل میڈیا پلیٹ فارم انسٹاگرام پر جاری ایک ویڈیو میں انکشاف کیا کہ جنوری 2026 میں ہونے والی برطرفیوں میں حیران کن طور پر اکثریت ہائی اسکلڈ ملازمین کی تھی، نہ کہ کم ہنر یا غیر ملکی کارکنوں کی۔

انہوں نے بتایا کہ ملائیشیا کی سوشل سیکیورٹی تنظیم کے لیبر مارکیٹ ڈیٹا کے مطابق صرف جنوری 2026 میں 10,658 افراد کو ملازمتوں سے نکالا گیا، جن میں سے 53.7 فیصد ہائی اسکلڈ افراد تھے۔ اس کے مقابلے میں 33 فیصد نیم ہنر مند اور صرف 11.5 فیصد کم ہنر مند کارکن متاثر ہوئے۔

ڈیوڈ یانگ کے مطابق، “یہ واضح اشارہ ہے کہ اب صرف ڈگری رکھنے سے کوئی فرق نہیں پڑتا، کیونکہ مارکیٹ کی ضروریات اور کمپنیوں کی ترجیحات بدل چکی ہیں۔” ان کا کہنا تھا کہ ایسے افراد بھی متاثر ہوئے جو خود کو محفوظ سمجھتے تھے، جیسے مینیجرز، انجینئرز اور دیگر پیشہ ور افراد۔

اعداد و شمار کے مطابق سب سے زیادہ متاثر ہونے والے افراد کی عمر 30 سے 45 سال کے درمیان تھی، جو مجموعی برطرفیوں کا 44.1 فیصد بنتے ہیں۔ اس کے بعد 45 سال سے زائد عمر کے افراد 31.8 فیصد جبکہ 30 سال سے کم عمر افراد 24.1 فیصد رہے۔

ماہرین کے مطابق یہ وہ طبقہ ہے جس پر مالی ذمہ داریاں سب سے زیادہ ہوتی ہیں، جیسے گھر کے قرضے، گاڑیوں کی اقساط اور بچوں کی پرورش کے اخراجات، جس کے باعث ان پر معاشی دباؤ مزید بڑھ جاتا ہے۔

مزید تفصیلات کے مطابق برطرفیوں کا زیادہ تر اثر کوالالمپور (3,511 افراد)، سیلانگور (2,752) اور جوہر (916) میں دیکھا گیا۔ شعبہ جات کے لحاظ سے سب سے زیادہ متاثر ہونے والا سیکٹر سروسز رہا جہاں 7,219 ملازمین فارغ کیے گئے، اس کے بعد مینوفیکچرنگ (2,244) اور کنسٹرکشن (1,019) کا نمبر آتا ہے۔

برطرفیوں کی بنیادی وجوہات میں کاروبار کی بندش (2,395 کیسز)، ریٹائرمنٹ (2,173) اور دیگر عوامل شامل تھے۔ تاہم فروری 2026 میں اگرچہ مجموعی برطرفیوں میں کمی ہو کر 7,512 رہ گئی، لیکن ہائی اسکلڈ ملازمین کا تناسب مزید بڑھ کر 54.4 فیصد ہو گیا۔

فروری کے اعداد و شمار کے مطابق اس بار برطرفیوں کی بڑی وجہ کمپنیوں کی جانب سے ڈاؤن سائزنگ (1,769 کیسز) رہی، جبکہ کاروباری بندش کے کیسز 1,620 تھے۔ اس سے ظاہر ہوتا ہے کہ کمپنیاں اخراجات کم کرنے کے لیے تجربہ کار اور مہنگے ملازمین کو بھی فارغ کر رہی ہیں۔

آن لائن صارفین نے اس صورتحال پر تشویش کا اظہار کرتے ہوئے کہا کہ حکومت اور متعلقہ اداروں کو اپنی پالیسیوں پر نظر ثانی کرنی چاہیے، خاص طور پر ملٹی نیشنل کمپنیوں میں مقامی ہنر مند افراد کو بہتر مواقع فراہم کرنے چاہیئیں۔

ایک تبصرہ نگار نے کہا، “مسئلہ یہ ہے کہ کاروبار کی لاگت مسلسل بڑھ رہی ہے، جس کی وجہ سے کمپنیاں اخراجات کم کرنے پر مجبور ہیں۔” جبکہ ایک اور صارف نے نشاندہی کی کہ ٹیکنالوجی اور آٹومیشن کی تیزی سے ترقی بھی ملازمتوں میں کمی کا ایک اہم سبب بن رہی ہے۔

پس منظر کے طور پر دیکھا جائے تو 2025 میں ہائی اسکلڈ ملازمتوں میں 28 فیصد اضافہ ریکارڈ کیا گیا تھا، تاہم 2026 میں صورتحال تبدیل ہوتی نظر آ رہی ہے، جہاں ایک طرف ملازمتوں کے مواقع بڑھ رہے ہیں تو دوسری طرف برطرفیوں میں بھی اضافہ ہو رہا ہے۔

تبصرہ نگاروں کا کہنا ہے کہ مستقبل میں صرف ڈگری کے بجائے مسلسل اسکل اپ گریڈیشن، ٹیکنالوجی کی سمجھ اور عملی مہارتیں ہی ملازمت کے تحفظ کی ضمانت بن سکتی ہیں۔