غیر قانونی تارکین وطن کی خفیہ بستی بے نقاب

شاہ عالم: ملائیشیا کے علاقے شاہ عالم میں حکام نے ایک بڑی کارروائی کے دوران غیر قانونی تارکین وطن کی خفیہ بستی کا سراغ لگا لیا، جس کے لیے اہل...

شاہ عالم: ملائیشیا کے علاقے شاہ عالم میں حکام نے ایک بڑی کارروائی کے دوران غیر قانونی تارکین وطن کی خفیہ بستی کا سراغ لگا لیا، جس کے لیے اہلکاروں کو تقریباً 400 میٹر اونچی پہاڑی چڑھ کر دشوار گزار علاقے تک پہنچنا پڑا۔

تفصیلات کے مطابق سیلانگور امیگریشن ڈیپارٹمنٹ کی قیادت میں کی گئی اس مشترکہ کارروائی کا آغاز رات 12 بجے ہوا، جو تقریباً دو گھنٹے جاری رہی۔ کارروائی کے دوران نہ صرف پہاڑی پر قائم خفیہ بستی بلکہ اس کے قریب واقع عارضی رہائشی مکانات (ہاؤسز) کو بھی نشانہ بنایا گیا۔

حکام کے مطابق یہ بستی ایک باقاعدہ چھوٹے گاؤں کی شکل اختیار کر چکی تھی، جہاں مسجد (سُراؤ)، چھوٹی دکان، پانی کی فراہمی، گیس سلنڈر اور بجلی کے لیے جنریٹر جیسے انتظامات موجود تھے۔ حکام نے ان سہولیات کو دیکھتے ہوئے خدشہ ظاہر کیا کہ یہاں کافی عرصے سے منظم انداز میں رہائش اختیار کی گئی تھی۔

سیلانگور امیگریشن کے ڈائریکٹر خیرال امینس کمارالدین نے میڈیا کو بتایا کہ ابتدائی تحقیقات سے معلوم ہوا ہے کہ یہ تین مختلف مقامات پر قائم بستیاں گزشتہ 5 سے 9 سال کے دوران وجود میں آئیں۔ انہوں نے کہا کہ ان علاقوں کا مجموعی رقبہ تقریباً 0.8 ہیکٹر ہے اور یہاں رہنے والے افراد زیادہ تر قریبی علاقوں میں غیر قانونی طور پر مزدوری اور صفائی کے کام کرتے تھے۔

انہوں نے مزید انکشاف کیا کہ بستی میں ایک منظم نظام موجود تھا جہاں ایک مخصوص فرد کو سربراہ کی حیثیت حاصل تھی، جو رہائشیوں سے ماہانہ کرایہ بھی وصول کرتا تھا۔ ان کے مطابق اس سے ظاہر ہوتا ہے کہ یہ صرف عارضی ٹھکانہ نہیں بلکہ ایک مکمل غیر قانونی کمیونٹی بن چکی تھی۔

کارروائی میں مجموعی طور پر 303 اہلکاروں اور افسران نے حصہ لیا، جن میں امیگریشن ڈیپارٹمنٹ، پولیس، پاسوکن جیرکان عام (پی جی اے)، شاہ عالم سٹی کونسل (ایم بی ایس اے)، نیشنل رجسٹریشن ڈیپارٹمنٹ (جے پی این) اور سول ڈیفنس فورس (اے پی ایم) شامل تھے۔

حکام نے اس دوران 356 افراد کی جانچ پڑتال کی، جن میں سے 214 غیر قانونی تارکین وطن کو گرفتار کیا گیا۔ گرفتار افراد کا تعلق انڈونیشیا، میانمار، بنگلہ دیش، بھارت، پاکستان اور سری لنکا سے بتایا گیا ہے۔ ان پر بغیر دستاویزات رہنے، ویزا کی مدت ختم ہونے کے باوجود قیام، اور جعلی یا غیر تسلیم شدہ کارڈ رکھنے جیسے الزامات عائد کیے گئے ہیں۔

خیرال امینس کے مطابق گرفتار افراد کو مزید تحقیقات کے لیے سمنیہ امیگریشن ڈیپو منتقل کر دیا گیا ہے۔ انہوں نے یہ بھی کہا کہ اس مقام پر دو سال قبل بھی کارروائی کی گئی تھی، تاہم دوبارہ آبادی قائم ہونا اس بات کی نشاندہی کرتا ہے کہ ممکنہ طور پر زمین کے مالک یا دیگر عناصر کی ملی بھگت شامل ہو سکتی ہے۔

دوسری جانب شاہ عالم سٹی کونسل کے سینئر اسسٹنٹ ڈائریکٹر زکریا مت پیاح نے بتایا کہ ابتدائی تحقیقات سے معلوم ہوا ہے کہ ایک مقام پر زمین کے مالک نے غیر قانونی طور پر رہائش کی اجازت دی تھی۔ انہوں نے کہا کہ اگر تعمیرات کے لیے کوئی قانونی منظوری موجود نہ ہوئی تو متعلقہ قوانین کے تحت کارروائی کرتے ہوئے ان عمارتوں کو مسمار کیا جا سکتا ہے اور زمین کے مالک پر جرمانہ بھی عائد کیا جا سکتا ہے۔

حکام نے عندیہ دیا ہے کہ اس بستی کو مکمل طور پر ختم کرنے کے لیے جلد ہی مسماری کی کارروائی کی جائے گی تاکہ مستقبل میں اس مقام کو دوبارہ استعمال نہ کیا جا سکے۔ مزید برآں، حکام نے اس بات پر بھی افسوس کا اظہار کیا کہ حکومت کی جانب سے جاری کردہ "ریپٹری ایشن پروگرام" کے باوجود غیر قانونی تارکین وطن وطن واپسی کے مواقع سے فائدہ نہیں اٹھا رہے۔

یہ کارروائی ملائیشیا میں غیر قانونی امیگریشن کے خلاف جاری کریک ڈاؤن کا حصہ ہے، جس کا مقصد نہ صرف قانون کی عملداری کو یقینی بنانا بلکہ غیر قانونی رہائش گاہوں کے خاتمے کے ذریعے سماجی و سکیورٹی مسائل کو کم کرنا بھی ہے۔