ملائیشیا کی جیل سے فرار پاکستانی قیدی کی تلاش جاری

کوالالمپور: ملائیشیا میں ایک 24 سالہ پاکستانی قیدی کے جیل سے فرار ہونے کے بعد ملک بھر میں اس کی تلاش کے لیے بڑے پیمانے پر آپریشن جاری ہے۔ پو...

کوالالمپور: ملائیشیا میں ایک 24 سالہ پاکستانی قیدی کے جیل سے فرار ہونے کے بعد ملک بھر میں اس کی تلاش کے لیے بڑے پیمانے پر آپریشن جاری ہے۔ پولیس کے مطابق مذکورہ شخص سنگائی بولوہ جیل سے 9 اپریل کو حراست سے فرار ہوا۔

پولیس حکام کے مطابق ملزم، جس کی شناخت محمد حسن کے نام سے کی گئی ہے، پر متعدد سنگین الزامات عائد ہیں جن میں بچوں کے خلاف جنسی جرائم، ڈکیتی اور امیگریشن قوانین کی خلاف ورزیاں شامل ہیں۔ حکام نے اسے خطرناک قرار دیتے ہوئے عوام کو ہدایت کی ہے کہ اگر وہ نظر آئے تو اس کے قریب جانے سے گریز کریں اور فوری متعلقہ حکام کو اطلاع دیں۔

ابتدائی معلومات کے مطابق قیدی اس وقت فرار ہونے میں کامیاب ہوا جب اسے عدالت میں پیشی کے بعد منتقل کیا جا رہا تھا۔ یہ واقعہ شاہ عالم کے قریب پیش آیا جہاں وہ ایک گاڑی سے نکل کر فرار ہو گیا۔

پولیس کا کہنا ہے کہ 12 اپریل تک کی اطلاعات کے مطابق ملزم اب بھی ملائیشیا کے اندر ہی موجود ہو سکتا ہے۔ آخری بار اسے نارنجی رنگ کی ٹی شرٹ اور سیاہ پتلون میں دیکھا گیا تھا۔

حکام کے مطابق اس کیس میں متعدد سیکیورٹی ادارے مشترکہ طور پر کارروائی کر رہے ہیں جن میں جنرل آپریشنز فورس، ایئر آپریشنز فورس اور داخلی سلامتی و امن و امان کے محکمے شامل ہیں۔ اس کے علاوہ ملک کی سرحدوں پر بھی نگرانی سخت کر دی گئی ہے تاکہ ملزم بیرون ملک فرار نہ ہو سکے۔

پولیس حکام نے کہا ہے کہ صورتحال قابو میں ہے تاہم عوام کو ہوشیار رہنے کی ضرورت ہے۔ ساتھ ہی شہریوں کو غیر مصدقہ اطلاعات پھیلانے سے بھی خبردار کیا گیا ہے کیونکہ اس سے تحقیقات متاثر ہو سکتی ہیں اور غیر ضروری خوف پیدا ہو سکتا ہے۔

پولیس نے عوام سے اپیل کی ہے کہ اگر کسی کے پاس ملزم کے بارے میں معلومات ہوں تو فوری طور پر قریبی پولیس اسٹیشن سے رابطہ کریں تاکہ اسے جلد از جلد گرفتار کیا جا سکے۔

یہ واقعہ ملائیشیا کے جیل سیکیورٹی نظام اور قیدیوں کی منتقلی کے طریقہ کار پر سوالات بھی اٹھا رہا ہے، جبکہ حکام نے یقین دہانی کرائی ہے کہ ایسے واقعات کی روک تھام کے لیے مزید اقدامات کیے جائیں گے۔