کوالالمپور کے علاقے کیپونگ میں دو اعلیٰ درجے کے تفریحی مراکز پر کارروائی کے دوران 107 غیر قانونی غیر ملکیوں کو حراست میں لے لیا گیا۔ یہ کارر...
کوالالمپور کے علاقے کیپونگ میں دو اعلیٰ درجے کے تفریحی مراکز پر کارروائی کے دوران 107 غیر قانونی غیر ملکیوں کو حراست میں لے لیا گیا۔ یہ کارروائی محمکہ امیگریشن ملائیشیا نے “اوپس گیگار” کے تحت انجام دی۔
امیگریشن کے ڈائریکٹر جنرل زکریا شعبان کے مطابق کارروائی جمعہ کی رات 11 بجے کی گئی، جو خصوصی ٹاسک فورس کی دو ہفتوں کی خفیہ نگرانی کے بعد عمل میں آئی۔
کارروائی کے دوران 224 افراد کی جانچ کی گئی جن میں 171 غیر ملکی اور 53 مقامی شہری شامل تھے۔ ابتدائی جانچ کے بعد 107 غیر ملکیوں کو گرفتار کیا گیا جن کے پاس ملک میں قیام کے لیے درست سفری دستاویزات یا اجازت نامے موجود نہیں تھے۔
گرفتار افراد میں 65 خواتین اور تین مرد تھائی لینڈ سے، 18 خواتین ویتنام سے، 11 مرد بنگلہ دیش سے، سات خواتین لاؤس سے اور تین خواتین انڈونیشیا سے تعلق رکھتی ہیں۔ حکام کے مطابق ان افراد کو مختلف امیگریشن قوانین کی خلاف ورزی کے شبہے میں حراست میں لے کر مزید کارروائی کے لیے امیگریشن ڈپو لینگینگ منتقل کر دیا گیا ہے۔
حکام نے کارروائی کے دوران متعدد اشیاء ضبط کیں جن میں ادائیگی کے چِپس، ہار، کمپیوٹر سیٹ اور سی سی ٹی وی نظام شامل ہیں۔ ابتدائی معلومات کے مطابق غیر ملکی خواتین کو ایک منتظم کے ذریعے منظم کیا جاتا تھا جو صارفین کے لیے خدمات اور اسٹیج پروگرام ترتیب دیتا تھا، جبکہ خدمات کی قیمت رنگین کارڈ سسٹم کے تحت مقرر کی جاتی تھی۔
اس معاملے میں سات مقامی شہریوں کو بھی تحقیقات میں معاونت کے لیے نوٹس جاری کیے گئے ہیں۔ امیگریشن حکام نے واضح کیا ہے کہ قوانین کی خلاف ورزی پر سخت کارروائی جاری رکھی جائے گی اور عوام سے معلومات فراہم کرنے کی اپیل کی گئی ہے۔
COMMENTS