ملائیشیا میں غیر ملکی ملازمین کے لیے نیا ڈیجیٹل سسٹم متعارف

ملائیشیا نے غیر ملکی ملازمین (ایکسپیٹریٹس) کے لیے ایک نیا ڈیجیٹل نظام متعارف کرا دیا ہے جس کا مقصد درخواستوں کے عمل کو آسان، تیز اور شفاف بن...

ملائیشیا نے غیر ملکی ملازمین (ایکسپیٹریٹس) کے لیے ایک نیا ڈیجیٹل نظام متعارف کرا دیا ہے جس کا مقصد درخواستوں کے عمل کو آسان، تیز اور شفاف بنانا ہے۔ یہ نیا نظام 16 مارچ 2026 سے نافذ العمل ہو چکا ہے۔

یہ سسٹم ملائشین انویسٹمنٹ ڈیویلپمنٹ اتھارٹی کی جانب سے متعارف کرایا گیا ہے جسے میڈا ایکسپیٹریئٹ سسٹم (ایم ای ایس) کا نام دیا گیا ہے۔ اس کے ذریعے ایمپلائمنٹ پاس (ای پی) اور پروفیشنل وزٹ پاس (پی وی پی) کی درخواستوں کو مکمل طور پر ڈیجیٹل انداز میں پراسیس کیا جائے گا۔

نئے نظام کو (ایم وائی آئی ایم ایم ایس) کے ساتھ منسلک کیا گیا ہے، جبکہ درخواستیں انویسٹ ملائشیا اور ایکسپیٹ گیٹ وے کے ذریعے جمع ہوں گی۔ اس انضمام سے کمپنی رجسٹریشن، ملازمت کی منظوری، پاس کی منظوری اور ای پاس کی تصدیق ایک ہی پلیٹ فارم پر مکمل ہو سکے گی۔

حکام کے مطابق اس سسٹم کے تحت درخواستوں کی پراسیسنگ کا وقت کم کر کے 15 ورکنگ ڈیز کر دیا گیا ہے۔ اس میں 10 دن ایم آئی ڈی اے کی جانب سے اور 5 دن امیگریشن یونٹ کی جانب سے درکار ہوں گے، بشرطیکہ درخواست مکمل ہو۔

ایم ای ایس کے تحت کمپنیوں کو اب تمام دستاویزات صرف ایک بار اپ لوڈ کرنے کی سہولت دی گئی ہے، جس سے بار بار دستاویزات جمع کرانے کی ضرورت ختم ہو جائے گی۔

یہ نظام مینوفیکچرنگ سیکٹر اور منتخب سروسز سیکٹر کے لیے متعارف کیا گیا ہے۔ ان میں وہ کمپنیاں شامل ہیں جن کے پاس مینوفیکچرنگ لائسنس، یا میڈا کی جانب سے دی گئی مراعات، اسٹیٹس یا گرانٹس موجود ہوں۔ دیگر کمپنیوں کو اب بھی ایمپلائمنٹ پاس کی درخواست کے لیے ای ایس ڈی سسٹم استعمال کرنا ہوگا۔

ایمپلائمنٹ پاس کے لیے دو اقسام برقرار رکھی گئی ہیں، جن میں کی پوسٹ اور ٹرم پوسٹ شامل ہیں۔ نئے قواعد کے مطابق کی پوسٹ کے لیے کم از کم ماہانہ تنخواہ 15 ہزار رنگٹ جبکہ ٹرم پوسٹ کے لیے 5 ہزار رنگٹ مقرر کی گئی ہے۔

مزید شرائط میں کمپنی کا کم از کم ادا شدہ سرمایہ 250 ہزار سے 500 ہزار رنگٹ ہونا ضروری ہے، جبکہ کی پوسٹ کے لیے غیر ملکی سرمایہ کم از کم 10 لاکھ رنگٹ ہونا چاہیے۔ اس کے علاوہ پاسپورٹ کی میعاد کم از کم 12 ماہ ہونا بھی لازمی قرار دیا گیا ہے۔

پروفیشنل وزٹ پاس (پی وی پی) کے حوالے سے ایک اہم تبدیلی یہ ہے کہ اب اس کی درخواستیں بھی میڈا کے ذریعے پراسیس ہوں گی۔ یہ پاس ان افراد کے لیے ہے جو مختصر مدت کے لیے تکنیکی کام، ٹریننگ یا مشاورت کے لیے آتے ہیں، اور اس کی زیادہ سے زیادہ مدت 12 ماہ ہے۔

پروفیشنل وزٹ پاس  ہولڈرز کو اپنے ساتھ فیملی لانے کی اجازت نہیں ہوگی اور وہ کسی دوسری کمپنی کے لیے کام بھی نہیں کر سکیں گے۔ تاہم، مخصوص شرائط کے تحت پی وی پی کو ای پی میں تبدیل کیا جا سکتا ہے۔

درخواست دینے کے لیے کمپنیوں کو سب سے پہلے انویسٹ ملائشیا پر رجسٹریشن کرنا ہوگا، جس کے بعد ایکسپیٹ گیٹ وے کے ذریعے درخواست جمع کرائی جائے گی۔ اگر درخواست مسترد ہو جائے تو کمپنی فوری طور پر دوبارہ درخواست دے سکتی ہے۔

فیس کے حوالے سے ایمپلائمنٹ پاس کے لیے ایم آئی ڈی اے کی فیس 2000 رنگٹ مقرر کی گئی ہے، جبکہ امیگریشن فیس الگ سے وصول کی جائے گی۔ اسی طرح پی وی پی کے لیے ایم آئی ڈی اے فیس 1200 رنگٹ رکھی گئی ہے۔

حکام کے مطابق یہ نیا نظام سرمایہ کاروں کے لیے سہولت پیدا کرے گا اور بیوروکریسی کو کم کرے گا، جس سے ملائیشیا میں کاروباری سرگرمیوں کو فروغ ملنے کی توقع ہے۔