ملائیشیا کی ٹیکنالوجی کمپنی بیسٹینیٹ نے بین الاقوامی لیبر آرگنائزیشن کی جانب سے اپنے غیر ملکی کارکنوں کے مرکزی انتظامی نظام کی توثیق سے انکا...
ملائیشیا کی ٹیکنالوجی کمپنی بیسٹینیٹ نے بین الاقوامی لیبر آرگنائزیشن کی جانب سے اپنے غیر ملکی کارکنوں کے مرکزی انتظامی نظام کی توثیق سے انکار کے باوجود دعویٰ کیا ہے کہ یہ پلیٹ فارم اب بھی عالمی سطح پر معتبر اور قابلِ اعتماد ہے۔
کمپنی نے جمعرات کو اپنے قانونی نمائندوں کے ذریعے جاری بیان میں کہا کہ آئی ایل او کی حالیہ وضاحت کو اس انداز میں نہیں لیا جانا چاہیے جس سے ہمارے نظام کی ساکھ یا بین الاقوامی سطح پر حاصل ہونے والی کامیابیوں کو نقصان پہنچے۔
بیان میں کہا گیا کہ ہمارے نظام کو ورلڈ سمٹ ایوارڈز جیسے عالمی پلیٹ فارمز پر تسلیم کیا گیا، جو اقوام متحدہ کے پائیدار ترقیاتی اہداف سے ہم آہنگ سمجھے جاتے ہیں۔ کمپنی کے مطابق یہ اعزاز اس نظام کی جدت، وسعت اور غیر ملکی کارکنوں کے انتظام، شفافیت اور قانونی نگرانی میں ممکنہ کردار کا اعتراف تھا۔
یہ وضاحت اس وقت سامنے آئی جب دو روز قبل آئی ایل او نے واضح کیا تھا کہ اس نے نہ تو فارین ورکرز سینٹرلائزڈ منیجمنٹ سسٹم اور نہ ہی بیسٹینیٹ کی کبھی توثیق کی، اور نہ ہی یہ نظام اقوام متحدہ کی کسی باضابطہ منظوری کا حامل ہے۔
بیسٹینیٹ نے اعتراف کیا کہ آئی ایل او نے اس کمپنی کی تکنیکی صلاحیت یا اسناد کی آزادانہ جانچ نہیں کی تھی، اس لیے کسی قسم کی رسمی منظوری نہیں دی گئی۔ تاہم کمپنی نے کہا کہ اس مؤقف سے وہ پہلے بھی اختلاف نہیں کرتی تھی۔
کمپنی کے مطابق فارین ورکرز سینٹرلائزڈ منیجمنٹ سسٹم نے سائبر سکیورٹی، ڈیٹا پروٹیکشن اور آپریشنل سالمیت کے حوالے سے سخت تقاضے پورے کیے ہیں۔ اس نظام کی تیاری میں امیگریشن، قانون نافذ کرنے والے اداروں، سکیورٹی ایجنسیوں اور دیگر متعلقہ حکام کے ساتھ تعاون بھی شامل رہا تاکہ یہ قومی سطح کے آپریشنز میں مؤثر کردار ادا کر سکے۔
بیسٹینیٹ کا کہنا ہے کہ یہ نظام سرحد پار لیبر بھرتیوں میں موجود دیرینہ مسائل کے حل کے لیے تیار کیا گیا۔ اس میں آجر کوٹہ تصدیق، بائیومیٹرک شناخت، میڈیکل ویری فکیشن، انشورنس، کمپلائنس مانیٹرنگ اور مکمل ٹریس ایبلٹی جیسے فیچرز شامل ہیں تاکہ دھوکہ دہی، غیر قانونی بھرتیوں اور کارکنوں کی تبدیلی جیسے مسائل کو کم کیا جا سکے۔
یہ نظام 2018 سے ملائیشیا میں غیر ملکی کارکنوں، خصوصاً بنگلہ دیشی ورکرز کی بھرتی کے لیے استعمال ہو رہا ہے۔ اس کے تحت ہیلتھ اسکریننگ، انشورنس اور ایجنٹ مینجمنٹ جیسے ماڈیولز بھی شامل ہیں۔
تاہم گزشتہ کچھ عرصے سے اس نظام پر بنگلہ دیشی کارکنوں کے استحصال اور غیر شفاف کاروباری معاملات کے الزامات لگتے رہے ہیں، جنہیں بیسٹینیٹ مسلسل مسترد کرتا آیا ہے۔
کمپنی نے مزید کہا کہ وہ آئی ایل او، انٹرنیشنل آرگنائزیشن فار مائیگریشن اور اقوام متحدہ کے دفتر برائے منشیات و جرائم کی ان تشویشات سے اتفاق کرتی ہے جن میں ایسے تارکین وطن کارکنوں کا ذکر کیا گیا تھا جو وعدہ شدہ ملازمتوں کے بغیر ملائیشیا پہنچ رہے تھے۔
بیسٹینیٹ نے اس بات کا بھی خیر مقدم کیا کہ آئی ایل او ملائیشیا اور مزدور بھیجنے والے ممالک کی حکومتوں کے ساتھ سہ فریقی مشاورت کی حمایت کرتا ہے۔ کمپنی نے کہا کہ وہ ایسی کسی بھی مشاورت میں تعمیری انداز میں حصہ لینے کے لیے تیار ہے۔
کمپنی نے خبردار کیا کہ اگر کسی نے آئی ایل او کے بیان کو سیاق و سباق سے ہٹ کر پیش کرکے بیسٹینیٹ یا اس کے افسران کے خلاف گمراہ کن تاثر پیدا کرنے کی کوشش کی تو کمپنی قانونی کارروائی کا حق محفوظ رکھتی ہے۔
بیسٹینیٹ نے آئی ایل او کے “ایمپلائر پیز پرنسپل” کی بھی حمایت دہرائی، جس کے مطابق غیر ملکی کارکنوں کو بھرتی یا ملازمت کے اخراجات برداشت نہیں کرنے چاہئیں۔ کمپنی نے کہا کہ وہ کارکنوں سے کوئی فیس وصول نہیں کرتی اور نہ ہی بھرتی کی ادائیگیوں میں حصہ لیتی ہے۔ اس کے مطابق بھرتی کا یہ نظام صرف شفافیت اور جوابدہی کے لیے ایک ٹیکنالوجی پلیٹ فارم کے طور پر کام کرتا ہے جبکہ حکومتی پالیسیاں، لیوی اور فیسوں کے فیصلے متعلقہ حکام کے اختیار میں ہیں۔
COMMENTS