گینتنگ ہائی لینڈز میں نئی ٹول فیس 28 مئی سے نافذ

کوالالمپور: لائیشیا کے معروف سیاحتی مقام گینتنگ ہائی لینڈز جانے والے مسافروں کیلئے 28 مئی 2026 سے نئی ٹول فیس نافذ کی جا رہی ہے۔ نئی پالیسی ...

کوالالمپور: لائیشیا کے معروف سیاحتی مقام گینتنگ ہائی لینڈز جانے والے مسافروں کیلئے 28 مئی 2026 سے نئی ٹول فیس نافذ کی جا رہی ہے۔ نئی پالیسی کے تحت مختلف اقسام کی گاڑیوں پر الگ الگ شرح کے مطابق چارجز وصول کیے جائیں گے۔ یہ اقدام جالان گینٹنگ ہائی لینڈز کے مجاز روڈ آپریٹر “لنگکارن چیکاپ سنڈیرین برہاد” کی جانب سے متعارف کروایا گیا ہے۔

رپورٹس کے مطابق ٹول نظام دو مرحلوں میں نافذ ہوگا اور گینٹنگ سیمپاہ یا گوہٹونگ جایا کے راستے گینٹنگ ہائی لینڈز میں داخل ہونے والی تمام مجاز گاڑیوں پر اس کا اطلاق ہوگا۔ کمپنی کا کہنا ہے کہ اس اقدام کا مقصد سڑکوں کے انتظام، دیکھ بھال اور ٹریفک کنٹرول کو مزید بہتر بنانا ہے۔

مرحلہ اول کے تحت کلاس 1 گاڑیوں یعنی کاروں اور وینز کیلئے 5 رنگٹ فیس مقرر کی گئی ہے۔ درمیانے درجے کی لاریوں (کلاس 2) کیلئے 15 رنگٹ جبکہ بھاری لاریوں (کلاس 3) پر 25 رنگٹ چارج عائد کیا گیا ہے۔ اسی طرح ٹیکسیوں (کلاس 4) کیلئے 3.30 رنگٹ اور بسوں (کلاس 5) کیلئے 5 رنگٹ فیس مقرر کی گئی ہے۔

کمپنی نے وضاحت کی کہ کلاس 2، 3، 4 اور 5 کی گاڑیوں کو مخصوص “لورونگ خاص” یا اسپیشل لین استعمال کرنا ہوگی۔ اس کے علاوہ لائسنس پلیٹ ریکگنیشن سسٹم کے ذریعے بھی ادائیگی اور داخلہ ممکن ہوگا۔ یہ نظام ٹریفک روانی کو بہتر بنانے کیلئے متعارف کروایا جا رہا ہے تاکہ گاڑیوں کی طویل قطاروں سے بچا جا سکے۔

ٹول آپریٹر کے مطابق موٹر سائیکلوں اور ایمرجنسی گاڑیوں کو مکمل استثنا حاصل ہوگا اور ان سے کسی قسم کی فیس وصول نہیں کی جائے گی۔ اس کے علاوہ گینٹنگ ہائی لینڈز میں موجود سرکاری اداروں میں خدمات انجام دینے والے ملازمین کی گاڑیوں کیلئے بھی خصوصی رعایت رکھی گئی ہے۔

کمپنی نے بتایا کہ سرکاری اسکولوں، پولیس اسٹیشنز، فائر اینڈ ریسکیو ڈیپارٹمنٹ، ضلعی دفاتر اور سرکاری کلینکس میں کام کرنے والے ملازمین اپنی نجی گاڑیوں کی رجسٹریشن کے بعد ٹول رعایت حاصل کرسکیں گے۔ تاہم انہیں مخصوص لین یا ایل پی آر سسٹم استعمال کرنا ہوگا۔

اٹھائیس جون سے مستقل رہائشیوں کیلئے ایک خصوصی اسکیم بھی شروع کی جا رہی ہے۔ اس اسکیم کے تحت ہر گھرانے سے دو کلاس 1 گاڑیوں کی رجسٹریشن کی اجازت ہوگی۔ اہل رہائشی یا تو عام فیس سے 10 فیصد کم رعایتی نرخ حاصل کرسکیں گے یا پھر چھ ماہ کا سیزن پاس خرید سکیں گے جس کے ذریعے غیر محدود بار داخلہ ممکن ہوگا۔

کمپنی کے مطابق رجسٹرڈ گاڑیوں سے 28 جون سے قبل کوئی چارج وصول نہیں کیا جائے گا۔ اس کے ساتھ ساتھ رعایتی اسکیموں اور استثنا کا وقتاً فوقتاً جائزہ لیا جائے گا تاکہ انہیں آپریشنل ضروریات اور پالیسی کے مطابق برقرار رکھا جا سکے۔

گینٹنگ ہائی لینڈز ملائیشیا کے سب سے زیادہ مقبول سیاحتی مقامات میں شمار ہوتا ہے جہاں ہر سال لاکھوں مقامی اور غیر ملکی سیاح آتے ہیں۔ یہاں ہوٹلز، شاپنگ مالز، تھیم پارکس اور تفریحی مراکز موجود ہیں، جس کی وجہ سے یہ مقام ملکی سیاحت میں اہم کردار ادا کرتا ہے۔ نئی ٹول پالیسی کے بعد توقع کی جا رہی ہے کہ سڑکوں کی دیکھ بھال اور ٹریفک مینجمنٹ میں مزید بہتری آئے گی۔

سوشل میڈیا پر اس فیصلے پر مختلف آراء سامنے آئی ہیں۔ بعض افراد نے اسے ضروری اقدام قرار دیا جبکہ کچھ صارفین نے کہا کہ اس سے سیاحوں اور روزانہ سفر کرنے والوں کے اخراجات میں اضافہ ہوگا۔ تاہم کمپنی کا مؤقف ہے کہ نئی فیس کا مقصد بہتر سروس اور انفراسٹرکچر کی فراہمی ہے۔