ملائیشیا میں طلبہ کی بنیادی ریاضی کمزور، کیلکولیٹر اور چیٹ جی پی ٹی پر انحصار بڑھنے کا انکشاف

کوالالمپور: ملائیشیا میں کی جانے والی ایک نئی تحقیق نے انکشاف کیا ہے کہ بڑی تعداد میں طلبہ بنیادی ریاضی اور منطقی استدلال کی مہارتوں میں مشک...

کوالالمپور: ملائیشیا میں کی جانے والی ایک نئی تحقیق نے انکشاف کیا ہے کہ بڑی تعداد میں طلبہ بنیادی ریاضی اور منطقی استدلال کی مہارتوں میں مشکلات کا سامنا کر رہے ہیں، جبکہ کیلکولیٹرز اور مصنوعی ذہانت (اے آئی) پر مبنی ٹولز، خصوصاً چیٹ جی پی ٹی، پر انحصار تیزی سے بڑھ رہا ہے۔

یہ تحقیق ملائیشیا کی معروف تعلیمی درسگاہ (یو کے ایم) کی سینئر لیکچرر اور ڈیٹا اینالیٹکس و ڈیجیٹل ہیلتھ کی ماہر نے انجام دی۔ ان کا کہنا ہے کہ اگر بچوں میں ابتدائی عمر سے عددی اور تجزیاتی صلاحیتوں کو مضبوط نہ بنایا گیا تو مستقبل میں ایک ایسی نسل پروان چڑھ سکتی ہے جو جدید ٹیکنالوجی استعمال تو کر سکے گی لیکن تنقیدی سوچ اور منطقی تجزیے میں کمزور ہوگی۔

تحقیق مارچ 2024 سے فروری 2026 تک جاری رہی اور اس میں ضلع کے مضافاتی علاقوں میں واقع 12 اسکولوں کے طلبہ کو شامل کیا گیا۔ نتائج کے مطابق 9 سے 12 سال عمر کے 80 فیصد سے زائد طلبہ ایسے ریاضیاتی سوالات حل کرنے میں ناکام رہے جن میں بنیادی حساب کتاب اور منطقی استدلال کی ضرورت تھی۔

تحقیق میں یہ بھی سامنے آیا کہ طلبہ کی اکثریت ریاضی کے مسائل حل کرنے کے لیے اسمارٹ فون کیلکولیٹرز اور چیٹ جی پی ٹی جیسی اے آئی ایپلی کیشنز کا استعمال کر رہی تھی۔ محقق کے مطابق بہت سے بچوں کا خیال تھا کہ جب جواب حاصل کرنے کے لیے ٹولز موجود ہیں تو حساب کے طریقے سیکھنے کی ضرورت نہیں رہی۔

کالائیوانی چیلاپن نے کہا کہ اصل تشویش اس وقت پیدا ہوتی ہے جب ٹیکنالوجی کو سیکھنے میں مددگار ذریعہ بنانے کے بجائے مکمل متبادل کے طور پر استعمال کیا جائے۔ ان کے مطابق بعد ازاں حاصل ہونے والے نتائج سے معلوم ہوا کہ وہ طلبہ جو ڈیجیٹل ذرائع پر حد سے زیادہ انحصار کرتے تھے، سیکنڈری اسکول میں داخل ہونے کے بعد ریاضی میں نسبتاً کم کارکردگی دکھاتے تھے۔

انہوں نے واضح کیا کہ مسئلہ بچوں کی ذہانت کا نہیں بلکہ بدلتے ہوئے طرزِ زندگی کا ہے۔ جدید دور میں بچوں کے پاس روزمرہ زندگی میں نمبروں اور حسابی سرگرمیوں کے ساتھ کام کرنے کے مواقع کم ہوتے جا رہے ہیں۔ اس کے اثرات صرف تعلیمی نتائج تک محدود نہیں بلکہ سوچنے، تجزیہ کرنے اور درست فیصلے کرنے کی صلاحیتوں پر بھی پڑتے ہیں۔

ماہر تعلیم کے مطابق کیلکولیٹر اور چیٹ جی پی ٹی جواب تو فراہم کر سکتے ہیں، لیکن یہ فیصلہ کرنے کی صلاحیت کہ آیا جواب درست اور معقول ہے یا نہیں، صرف انسانی سوچ اور فہم سے پیدا ہوتی ہے۔ اسی لیے بنیادی ریاضیاتی اور استدلالی مہارتوں کی مضبوطی انتہائی ضروری ہے۔

مسئلے کے حل کے حوالے سے انہوں نے کہا کہ صرف اسکولوں پر انحصار کافی نہیں ہوگا بلکہ والدین اور معاشرے کو بھی کردار ادا کرنا ہوگا۔ والدین بچوں کو روزمرہ کے کاموں میں شامل کر سکتے ہیں، جیسے گھریلو بجٹ بنانا، خریداری کرنا، کھانے کی اشیاء کی مقدار ناپنا، سفر کے وقت کا اندازہ لگانا اور روایتی گھڑی پڑھنا۔ ایسی سرگرمیاں بچوں میں مسئلہ حل کرنے اور منطقی سوچ کی صلاحیت پیدا کرتی ہیں۔

انہوں نے یہ بھی تجویز دی کہ اسکولوں میں ریاضی کی تدریس کو محض امتحانات تک محدود رکھنے کے بجائے حقیقی زندگی کے مسائل اور عملی مثالوں سے جوڑا جائے۔ ان کے مطابق ٹیکنالوجی کو مسترد کرنا کوئی حل نہیں، کیونکہ جدید دنیا میں اس کا استعمال ناگزیر ہے۔ ضرورت اس بات کی ہے کہ معاشرے میں دوبارہ سوچنے اور تجزیہ کرنے کی ثقافت کو فروغ دیا جائے۔

کالائیوانی چیلاپن کا کہنا تھا کہ کھیلوں، منصوبہ بندی، باغبانی، کھانا پکانے، گھریلو کاموں اور دیگر روزمرہ سرگرمیوں کے ذریعے بچوں کو نمبروں سے قدرتی انداز میں جوڑا جا سکتا ہے۔ ان کے مطابق ریاضی کو صرف ایک تعلیمی مضمون سمجھنے کے بجائے سوچنے کی زبان کے طور پر دیکھا جانا چاہیے، کیونکہ رسید، ٹائم ٹیبل، ترکیب، کھیلوں کا اسکور، ایندھن کا بل، بینک اسٹیٹمنٹ اور تعمیراتی پیمائش سب ریاضی سیکھنے کے عملی ذرائع ہیں۔