ملائیشیا میں رجسٹرڈ پناہ گزینوں کی تعداد 2 لاکھ 15 ہزار سے تجاوز

کوالالمپور: ملائیشیا میں اقوام متحدہ کے ادارہ برائے مہاجرین (یو این ایچ سی آر) کے ساتھ رجسٹرڈ پناہ گزینوں اور پناہ کے متلاشی افراد کی تعداد...

کوالالمپور: ملائیشیا میں اقوام متحدہ کے ادارہ برائے مہاجرین (یو این ایچ سی آر) کے ساتھ رجسٹرڈ پناہ گزینوں اور پناہ کے متلاشی افراد کی تعداد فروری 2026 تک 2 لاکھ 15 ہزار 600 تک پہنچ گئی ہے۔ یہ اعداد و شمار یو این ایچ سی آر کی جانب سے جاری کردہ تازہ ترین معلومات میں سامنے آئے ہیں۔

رپورٹ کے مطابق ملائیشیا میں موجود پناہ گزینوں کی سب سے بڑی تعداد میانمار سے تعلق رکھنے والے افراد پر مشتمل ہے۔ ان میں روہنگیا برادری کے 1 لاکھ 93 ہزار 824 افراد شامل ہیں، جبکہ 15 ہزار 774 افراد چِن نسل سے تعلق رکھتے ہیں۔ اس کے علاوہ 33 ہزار 2 افراد میانمار کی دیگر نسلی برادریوں سے تعلق رکھتے ہیں۔ یہ تمام افراد اپنے ملک میں جاری تنازعات، تشدد اور مبینہ ظلم و ستم کے باعث نقل مکانی پر مجبور ہوئے۔

یو این ایچ سی آر کے اعداد و شمار کے مطابق میانمار کے علاوہ 50 سے زائد مختلف ممالک سے تعلق رکھنے والے 21 ہزار 776 پناہ گزین اور پناہ کے متلاشی افراد بھی ملائیشیا میں موجود ہیں۔ ان میں پاکستان کے 5 ہزار 760 شہری شامل ہیں، جو اس فہرست میں نمایاں تعداد رکھتے ہیں۔

رپورٹ کے مطابق یمن سے 3 ہزار 193، صومالیہ سے 2 ہزار 945، افغانستان سے 2 ہزار 931، شام سے 2 ہزار 471، سری لنکا سے 1 ہزار 43، فلسطین سے 514، جبکہ عراق سے 420 افراد ملائیشیا میں پناہ کے متلاشی یا پناہ گزین کے طور پر رجسٹرڈ ہیں۔

اعداد و شمار سے یہ بھی ظاہر ہوتا ہے کہ رجسٹرڈ پناہ گزینوں اور پناہ کے متلاشی افراد میں 46 فیصد مرد جبکہ 24 فیصد خواتین شامل ہیں۔ باقی تعداد میں مختلف عمر کے بچے اور دیگر افراد شامل ہیں۔ یو این ایچ سی آر کے مطابق تقریباً 64 ہزار 680 رجسٹرڈ بچے ایسے ہیں جن کی عمر 18 سال سے کم ہے، جو مجموعی پناہ گزین آبادی کا ایک اہم حصہ ہیں۔

یو این ایچ سی آر ملائیشیا نے بتایا کہ ملک نے حالیہ عرصے میں جبری نقل مکانی کے مسئلے سے نمٹنے کے لیے اپنی پالیسیوں کو مزید منظم بنانے کی کوشش کی ہے۔ اسی سلسلے میں حکومت نے جنوری 2026 میں "ڈوکومن پینڈافتران پلارین" (ڈی پی پی) یعنی پناہ گزین رجسٹریشن دستاویز کا نظام متعارف کرایا، جس کا مقصد پناہ گزینوں کی رجسٹریشن اور شناخت کے عمل کو بہتر بنانا ہے۔

ادارے کے مطابق یہ اقدام ایک ایسے قومی نظام کی تشکیل کی جانب اہم پیش رفت ہے جو زیادہ منظم، قابلِ پیش گوئی اور مقامی سطح پر مؤثر انداز میں نافذ کیا جا سکے۔ اس نظام کے ذریعے حکومت پناہ گزینوں اور پناہ کے متلاشی افراد کی بہتر شناخت اور ان کی ضروریات کا اندازہ لگانے میں مدد حاصل کر سکے گی۔

یو این ایچ سی آر نے مزید بتایا کہ ملائیشیا میں ایک ایسا پناہ گزینی نظام تیار کیا جا رہا ہے جو شفاف، منصفانہ اور آسان رسائی پر مبنی ہو۔ اس عمل میں یو این ایچ سی آر حکومت اور متعلقہ اداروں کو تکنیکی معاونت اور مشاورت فراہم کر رہا ہے تاکہ بین الاقوامی معیارات کے مطابق رجسٹریشن اور جانچ پڑتال کا نظام قائم کیا جا سکے۔

ادارے کے مطابق پناہ گزینوں کی مناسب رجسٹریشن اور دستاویزی ریکارڈ نہ صرف ان افراد کو بنیادی سہولیات، خصوصاً صحت کی خدمات تک رسائی فراہم کرنے میں مدد دیتا ہے بلکہ حکام کو ان کی تعداد، پس منظر اور ضروریات کو بہتر انداز میں سمجھنے کا موقع بھی فراہم کرتا ہے۔

یو این ایچ سی آر نے زور دیا کہ عالمی سطح پر جبری نقل مکانی کے بڑھتے ہوئے رجحان کے پیش نظر ملائیشیا کی حکومت، اقوام متحدہ کے اداروں، سول سوسائٹی اور بین الاقوامی شراکت داروں کے درمیان تعاون انتہائی اہم ہے تاکہ تنازعات اور ظلم و ستم سے فرار ہونے والے افراد کو ضروری تحفظ فراہم کیا جا سکے اور ان کے لیے پائیدار حل تلاش کیے جا سکیں۔